దర్శక ధీరుడు ఎస్.ఎస్. రాజమౌళి, ‘ఆర్ఆర్ఆర్’ చిత్రంతో ప్రపంచవ్యాప్త గుర్తింపు పొందిన తర్వాత, ఇప్పుడు సూపర్ స్టార్ మహేష్ బాబుతో తన తదుపరి భారీ ప్రాజెక్టును సిద్ధం చేస్తున్నారు. వారణాసి అనే టైటిల్ ను కూడా ఖరారు చేశారు. కేవలం టైటిల్ రివీల్ కోసమే రాజమౌళి ప్రపంచ స్థాయి స్క్రీన్ ఏర్పాటు చేశారు. తాజాగా సినిమాకు సంబంధించి సెట్ లను రివీల్ చేశారు. ఎప్పుడూ లేని విధంగా రియాలిటీకి ఏ మాత్రం తగ్గకుండా సెట్లు ఉండటంతో హాలీవుడ్ మీడియా కూడా దీనిని చూసి ఆశ్చర్యానికి గురవుతుంది.
కథా నేపథ్యం
రాజమౌళి ఇప్పటికే స్పష్టం చేసినట్లుగా, ఈ సినిమా ఒక ‘గ్లోబ్ ట్రాటింగ్ యాక్షన్ అడ్వెంచర్’. అంటే కథానాయకుడు ప్రపంచవ్యాప్తంగా వివిధ దేశాలలో తిరుగుతూ సాహసాలు చేస్తాడు. హాలీవుడ్ క్లాసిక్ ‘ఇండియానా జోన్స్’ తరహాలో ఈ సినిమా ఉంటుందని సమాచారం. విజయేంద్ర ప్రసాద్ అందించిన ఈ కథలో ఆఫ్రికా అడవుల నేపథ్యం కీలక పాత్ర పోషించనుంది. పురాణాల్లోని హనుమంతుడి లక్షణాలను స్ఫూర్తిగా తీసుకుని మహేష్ బాబు పాత్రను డిజైన్ చేసినట్లు వార్తలు వినిపిస్తున్నాయి.
మహేష్ బాబు మేకోవర్
ఈ సినిమా కోసం మహేష్ బాబు తన రూపాన్ని పూర్తిగా మార్చుకుంటున్నారు. గతంలో ఎన్నడూ లేని విధంగా పొడవాటి జుట్టు, గడ్డంతో ఆయన కనిపిస్తున్నారు. ఈ పాత్ర కోసం ఆయన విదేశాల్లో ప్రత్యేకమైన శారీరక శిక్షణ కూడా తీసుకున్నారు. రాజమౌళి సినిమాలో కథానాయకుడు పడే శ్రమ, పడే కష్టం తెరపై అద్భుతంగా కనిపిస్తాయి, ఈ క్రమంలో మహేష్ బాబును ఒక సాహసికుడిగా చూడటానికి అభిమానులు ఆసక్తిగా ఎదురుచూస్తున్నారు.
సాంకేతిక హంగులు
ఈ సినిమాను సుమారు 800 నుండి 1000 కోట్ల రూపాయల బడ్జెట్తో నిర్మిస్తున్నట్లు సమాచారం. హాలీవుడ్ టెక్నీషియన్లు, ముఖ్యంగా విజువల్ ఎఫెక్ట్స్ (VFX) కోసం అంతర్జాతీయ సంస్థలు ఈ ప్రాజెక్టులో భాగం కానున్నాయి. తారాగణం విషయంలో ఇంకా అధికారిక ప్రకటన రానప్పటికీ, పృథ్వీరాజ్ సుకుమారన్ లేదా ఇతర గ్లోబల్ స్టార్స్ నటించే అవకాశం ఉందని ప్రచారం జరుగుతోంది. సంగీత దర్శకుడు ఎం.ఎం. కీరవాణి ఇప్పటికే ఈ సినిమా కోసం ట్యూన్స్ సిద్ధం చేసే పనిలో ఉన్నారు. ప్రస్తుతం ఈ సినిమా షూటింగ్ శరవేగంగా పూర్తి చేసుకుంటుంది. చెప్పాలంటే, రాజమౌళి – మహేష్ బాబు కాంబినేషన్ కేవలం టాలీవుడ్ లేదా ఇండియాకు మాత్రమే పరిమితం కాకుండా, హాలీవుడ్ ప్రేక్షకులను కూడా ఆకట్టుకునేలా ఒక ‘గ్లోబల్ ఫిల్మ్’గా రాబోతోంది. తెలుగు సినిమా ఖ్యాతిని ఇది మరో మెట్టు ఎక్కిస్తుందనడంలో సందేహం లేదు. ఇప్పటికే ఈ సినిమా ప్రపంచ వ్యాప్తంగా ఏప్రిల్ 7, 2027న విడుదల చేసేందుకు రెడీ అయ్యారు నిర్మాతలు.