తమిళనాడు అసెంబ్లీ ఎన్నికల వేళ లోకనాయకుడు కమల్ హాసన్కు ఊహించని రాజకీయ సంకట పరిస్థితి ఎదురైంది. డీఎంకే కూటమిలో భాగస్వామిగా ఉన్న ఆయన పార్టీ మక్కల్ నీది మైయం (MNM), తమ సొంత గుర్తు అయిన ‘టార్చ్ లైట్’ (కాగడా)ను వదిలి డీఎంకే అధికారిక గుర్తు ‘ఉదయించే సూర్యుడు’ సింబల్పైనే పోటీ చేయాలని ముఖ్యమంత్రి స్టాలిన్ ఒత్తిడి తెస్తున్నారు. గత ఎన్నికల్లో కమల్ పార్టీకి ఆశించిన స్థాయిలో సీట్లు రాకపోయినా ఓట్ల శాతం మెరుగ్గా ఉండటంతో, ఈసారి ఓట్లు చీలిపోకుండా ఉండేందుకు డీఎంకే ఈ వ్యూహాన్ని అమలు చేస్తోంది.
ఈ ఎన్నికల ఒప్పందంలో భాగంగా కమల్ హాసన్కు ఇప్పటికే ఒక రాజ్యసభ సీటు ఖరారు చేయగా, మరో రెండు అసెంబ్లీ స్థానాలను కూడా కేటాయించే అవకాశం ఉంది. అయితే, ఈ రెండు అసెంబ్లీ స్థానాల్లోనూ కమల్ అభ్యర్థులు డీఎంకే గుర్తుపైనే పోటీ చేయాలని స్టాలిన్ పట్టుబడుతున్నారు. మిత్రపక్షాలను తమ గుర్తుపైనే పోటీ చేయించడం ద్వారా పోల్ మేనేజ్మెంట్ సులభతరం అవుతుందని, భవిష్యత్తులో వారు కూటమి నుండి విడిపోయే అవకాశం ఉండదని డీఎంకే భావిస్తోంది. దీనికి కమల్ హాసన్ కూడా సూత్రప్రాయంగా అంగీకరించినట్లు సమాచారం.
మరోవైపు, సొంత గుర్తును వదులుకోవడంపై MNM పార్టీ శ్రేణుల్లో ఆందోళన వ్యక్తమవుతోంది. తమ బ్రాండ్ అయిన కాగడా గుర్తును కాదని వేరే గుర్తుపై పోటీ చేస్తే పార్టీ ఉనికికే ప్రమాదం ఏర్పడుతుందని నాయకులు అభిప్రాయపడుతున్నారు. స్టాలిన్ ఇప్పటికే కూటమిలోని కాంగ్రెస్కు 28, సీపీఐకి 5, ఎండీఎంకేకు 4 స్థానాలను కేటాయించి సీట్ల సర్దుబాటును దాదాపు పూర్తి చేశారు. కమల్ హాసన్ తన రాజకీయ భవిష్యత్తు కోసం తీసుకునే ఈ నిర్ణయం సాయంత్రం అధికారికంగా వెలువడే అవకాశం ఉంది.