ఆంధ్రప్రదేశ్ ముఖ్యమంత్రి నారా చంద్రబాబు నాయుడు శనివారం హైదరాబాద్ పర్యటనలో భాగంగా తెలంగాణ ఉప ముఖ్యమంత్రి మల్లు భట్టి విక్రమార్క నివాసాన్ని సందర్శించారు. ఇటీవల వివాహం చేసుకున్న భట్టి విక్రమార్క కుమారుడు సూర్య విక్రమాదిత్య, కోడలు సాక్షిలను ఆశీర్వదించేందుకు ఆయన ప్రత్యేకంగా వెళ్లారు. చంద్రబాబుకు భట్టి విక్రమార్క దంపతులు సాదర స్వాగతం పలికారు. ఈ సందర్భంగా నూతన దంపతులకు చంద్రబాబు పుష్పగుచ్ఛం అందించి, వారు నిండు నూరేళ్లు సుఖసంతోషాలతో వర్ధిల్లాలని మనస్ఫూర్తిగా ఆకాంక్షించారు.
వాస్తవానికి తన కుమారుడి వివాహానికి చంద్రబాబును ఆహ్వానించేందుకు భట్టి విక్రమార్క స్వయంగా అమరావతికి వెళ్లి ఆహ్వాన పత్రికను అందించారు. అయితే, అప్పట్లో ఉన్న పాలనాపరమైన ఒత్తిడి మరియు ముందస్తు కార్యక్రమాల కారణంగా చంద్రబాబు మార్చి 5న జరిగిన వివాహ వేడుకకు హాజరు కాలేకపోయారు. ఈ నేపథ్యంలో హైదరాబాద్కు వచ్చిన సందర్భంగా, భట్టి నివాసానికి వెళ్లి మర్యాదపూర్వకంగా నూతన దంపతులను కలిసి తన శుభాకాంక్షలు తెలియజేశారు. ఈ పర్యటనలో ఇద్దరు అగ్ర నేతలు కాసేపు ఆత్మీయంగా ముచ్చటించారు.
మార్చి 5న శంషాబాద్లోని జీఎంఆర్ ఎరీనాలో జరిగిన ఈ వివాహ వేడుక అత్యంత వైభవంగా జరిగింది. ఈ వేడుకకు ఏఐసీసీ అధ్యక్షుడు మల్లికార్జున ఖర్గే, తెలంగాణ ముఖ్యమంత్రి రేవంత్ రెడ్డి, మెగాస్టార్ చిరంజీవి సహా పలువురు రాజకీయ మరియు సినీ రంగ ప్రముఖులు హాజరై సందడి చేశారు. తాజాగా ఏపీ ముఖ్యమంత్రి చంద్రబాబు కూడా భట్టి నివాసానికి వచ్చి ఆశీస్సులు అందించడం ఉభయ రాష్ట్రాల రాజకీయ వర్గాల్లో ప్రాధాన్యత సంతరించుకుంది. దీనికి సంబంధించిన ఫోటోలు ప్రస్తుతం సోషల్ మీడియాలో వైరల్ అవుతున్నాయి.