మానవత్వం ఇంకా చావలేదని నిరూపిస్తూ అమెరికాలో ఒక హృదయ విదారకమైన, స్ఫూర్తిదాయకమైన ఘటన వెలుగులోకి వచ్చింది. టెన్జీకి చెందిన 78 ఏళ్ల రిచర్డ్ పుల్లీ తన అనారోగ్యంతో ఉన్న భార్య బ్రెండా వైద్య ఖర్చుల కోసం ఈ వయసులోనూ డోర్ డ్యాష్ డెలివరీ బాయ్గా పనిచేస్తున్నాడు. రిటైర్మెంట్ వయసులో కూడా వణుకుతున్న చేతులతో ఆయన మెట్లు ఎక్కుతూ ఆహారాన్ని డెలివరీ చేస్తున్న వీడియో సోషల్ మీడియాలో వైరల్ అయ్యింది. తన భార్య ప్రాణాలను కాపాడుకోవడానికి ఆయన పడుతున్న తపన లక్షలాది మంది నెటిజన్ల మనసులను కలిచివేసింది.
రిచర్డ్ పరిస్థితిని గమనించిన బ్రిటానీ స్మిత్ అనే మహిళ, ఆయనకు సాయం చేయాలని నిర్ణయించుకొని ‘గో ఫండ్ మీ’ (GoFundMe) పేజీని ప్రారంభించింది. కేవలం 20 వేల డాలర్లు లక్ష్యంగా మొదలైన ఈ విరాళాల సేకరణకు ప్రపంచవ్యాప్తంగా అద్భుతమైన స్పందన లభించింది. అపరిచితులు సైతం రిచర్డ్ ప్రేమకు, కష్టానికి ముగ్ధులై భారీగా విరాళాలు పంపారు. కేవలం కొన్ని రోజుల్లోనే సుమారు 5 లక్షల డాలర్లు (భారత కరెన్సీలో దాదాపు రూ. 4 కోట్లు) విరాళంగా వచ్చి చేరాయి. ఈ భారీ మొత్తం ఆ వృద్ధ దంపతుల జీవితాల్లో చీకట్లను తొలగించి కొత్త వెలుగులను నింపింది.
56 ఏళ్ల వైవాహిక బంధంలో రిచర్డ్ తన భార్యపై చూపిన అనురాగం నిజమైన వాలెంటైన్ ప్రేమకు నిదర్శనమని ప్రజలు కొనియాడుతున్నారు. తనకు అందిన ఈ అనూహ్యమైన సాయంపై రిచర్డ్ దంపతులు భావోద్వేగానికి లోనయ్యారు. “తెలియని వ్యక్తులు కూడా మా కోసం ఇంతలా స్పందిస్తారని ఊహించలేదు, ఇప్పుడు మేము ప్రశాంతంగా జీవించగలం” అంటూ వారు కృతజ్ఞతలు తెలిపారు. సాంకేతికతను సరైన పద్ధతిలో ఉపయోగిస్తే ఒక నిరుపేద కుటుంబం జీవితాన్నే మార్చవచ్చని ఈ సంఘటన మరోసారి నిరూపించింది.