అమెరికా మరియు దక్షిణ కొరియా దేశాలు సంయుక్తంగా ‘ఫ్రీడమ్ షీల్డ్’ పేరుతో వార్షిక సైనిక విన్యాసాలు నిర్వహిస్తున్న తరుణంలో ఉత్తర కొరియా మరోసారి తన కవ్వింపు చర్యలను ఉధృతం చేసింది. శనివారం రోజున ఉత్తర కొరియా రాజధాని ప్యాంగ్యాంగ్ సమీపం నుండి ఒకేసారి ఏకంగా 10 క్షిపణులను ప్రయోగించి అంతర్జాతీయ సమాజంలో భయాందోళనలు రేకెత్తించింది. ఈ విషయాన్ని దక్షిణ కొరియా మిలిటరీ ధృవీకరించగా, ఇవి బాలిస్టిక్ క్షిపణులు అయ్యే అవకాశం ఉందని జపాన్ రక్షణ శాఖ కూడా అనుమానం వ్యక్తం చేసింది.
ఉత్తర కొరియా ప్రయోగించిన ఈ మిసైళ్లు జపాన్ దేశపు ఎక్స్క్లూజివ్ ఎకనమిక్ జోన్ (EEZ) వెలుపల ఉన్న సముద్ర జలాల్లో పడినట్లు సమాచారం. తమ దేశంపై ఎదురుదాడి జరిగే ముప్పును నిరోధించేందుకు మరియు అణ్వస్త్ర దాడిని తట్టుకునేందుకే ఈ శక్తిమంతమైన క్షిపణి పరీక్షలు చేస్తున్నట్లు ఉత్తర కొరియా అధినేత కిమ్ జోంగ్ ఉన్ ఇప్పటికే స్పష్టం చేశారు. ఈ వారం మొదట్లో కూడా ఒక వార్ షిప్ నుండి క్రూజ్ మిసైళ్లను ప్రయోగించిన కిమ్, తన కుమార్తె కిమ్ జు యేతో కలిసి ఈ ప్రయోగాలను ప్రత్యక్షంగా వీక్షించడం గమనార్హం.
ప్రస్తుతం ఇరాన్-ఇజ్రాయెల్ మధ్య యుద్ధ వాతావరణం నెలకొన్న వేళ, కొరియా ద్వీపకల్పంలో కూడా ఉద్రిక్తతలు పెరగడం ఆందోళన కలిగిస్తోంది. దక్షిణ కొరియా జాయింట్ చీఫ్స్ ఆఫ్ స్టాఫ్ ఈ పరిణామాలను నిశితంగా గమనిస్తున్నామని, అమెరికాతో కలిసి అప్రమత్తంగా ఉన్నామని ప్రకటించారు. కిమ్ జోంగ్ ఉన్ ప్రభుత్వం చేపడుతున్న ఈ వరుస క్షిపణి ప్రయోగాలు ప్రాంతీయ శాంతికి విఘాతం కలిగిస్తున్నాయని ఐక్యరాజ్యసమితి మరియు ఇతర అగ్రరాజ్యాలు ఆందోళన వ్యక్తం చేస్తున్నాయి.