మహిళా దినోత్సవం సందర్భంగా ‘భారత రాజకీయాల్లో మహిళల భాగస్వామ్యం, ప్రాతినిధ్యం’ అనే అంశంపై ఏడీఆర్ సంస్థ కీలక నివేదికను విడుదల చేసింది. దేశవ్యాప్తంగా ఉన్న మహిళా ఎంపీలు మరియు ఎమ్మెల్యేలలో మొత్తం 14 మంది బిలియనీర్లు (రూ. 100 కోట్లకు పైగా ఆస్తులు ఉన్నవారు) ఉన్నట్లు ఈ నివేదిక వెల్లడించింది. అత్యంత ఆసక్తికరమైన అంశం ఏమిటంటే, ఈ ధనిక మహిళా ప్రజాప్రతినిధుల జాబితాలో మొదటి మూడు స్థానాలను ఆంధ్రప్రదేశ్ ఎమ్మెల్యేలే కైవసం చేసుకున్నారు.
ఈ నివేదిక ప్రకారం, దేశంలోనే అత్యంత ధనిక మహిళా ప్రజాప్రతినిధిగా ఆంధ్రప్రదేశ్లోని కోవూరు ఎమ్మెల్యే వేమిరెడ్డి ప్రశాంతి రెడ్డి నిలిచారు. నెల్లూరు జిల్లాకు చెందిన ఈ టీడీపీ ఎమ్మెల్యే ఆస్తుల విలువ రూ. 716 కోట్లుగా నమోదైంది. ఆమె భర్త వేమిరెడ్డి ప్రభాకర్ రెడ్డి నెల్లూరు ఎంపీగా కొనసాగుతున్నారు. ఇక రెండో స్థానంలో కడప టీడీపీ ఎమ్మెల్యే రెడ్డెప్పగారి మాధవి రెడ్డి ఉన్నారు. ఈమె ఆస్తుల విలువ రూ. 388 కోట్లు. మూడో స్థానాన్ని జనసేన పార్టీకి చెందిన నెల్లిమర్ల ఎమ్మెల్యే లోకం నాగమాధవి దక్కించుకున్నారు. ఈమె ఆస్తి విలువ రూ. 291 కోట్లు.
దేశవ్యాప్తంగా ఉన్న మొత్తం 4,666 మంది ప్రజాప్రతినిధులలో మహిళల వాటా కేవలం 464 మాత్రమే ఉందని, అంటే చట్టసభల్లో మహిళా ప్రాతినిధ్యం కేవలం 10 శాతం మాత్రమేనని ఏడీఆర్ నివేదిక ఆందోళన వ్యక్తం చేసింది. రాజకీయాల్లో మహిళల సంఖ్య తక్కువగా ఉన్నప్పటికీ, ఆస్తుల పరంగా మాత్రం ఏపీ మహిళా నేతలు ముందంజలో ఉన్నారు. ఏపీలోని 24 మంది మహిళా ప్రజాప్రతినిధుల సగటు ఆస్తి రూ. 74 కోట్లుగా ఉంటే, తెలంగాణలోని 11 మంది మహిళా ప్రజాప్రతినిధుల సగటు ఆస్తి రూ. 14 కోట్లుగా ఉందని ఈ నివేదిక స్పష్టం చేసింది.