రంజాన్ మాసం సందర్భంగా ముస్లిం ప్రభుత్వ ఉద్యోగులు గంట ముందుగా కార్యాలయాల నుండి వెళ్లేందుకు తెలంగాణ ప్రభుత్వం కల్పించిన వెసులుబాటు రాజకీయ దుమారానికి దారితీసింది. పవిత్ర రంజాన్ మాసంలో ఉపవాస దీక్షలు చేసే వారు సకాలంలో ఇళ్లకు చేరుకుని ప్రార్థనలు చేసుకోవడానికి వీలుగా ఫిబ్రవరి 19 నుంచి మార్చి 20 వరకు సాయంత్రం 4 గంటలకే ఇంటికి వెళ్లేందుకు అనుమతిస్తూ ప్రభుత్వం ఉత్తర్వులు జారీ చేసింది. అయితే, ఈ నిర్ణయంపై సిద్ధ పీఠ్ హనుమాన్గఢీ ప్రధాన అర్చకుడు దేవేశాచార్య మహారాజ్ తీవ్ర ఆగ్రహం వ్యక్తం చేశారు.
ఈ వెసులుబాటు కేవలం ఓటు బ్యాంకు రాజకీయాల్లో భాగమేనని దేవేశాచార్య మహారాజ్ విమర్శించారు. ఒక వర్గానికి మాత్రమే ఇటువంటి ప్రత్యేక సౌకర్యాలు కల్పించడం వివక్షా పూరితమని ఆయన ఆరోపించారు. “ముస్లిం ఓట్ల కోసం ప్రభుత్వం ఎంతకైనా దిగజారుతోంది. హిందువుల పండుగలు లేదా నవరాత్రుల సమయంలో కూడా ఇలాంటి గంట ముందస్తు వెసులుబాటు కల్పిస్తారా?” అని ఆయన ప్రశ్నించారు. గతంలో హిందూ పండుగల సెలవులను రద్దు చేసేందుకు ప్రయత్నించిన ప్రభుత్వం, ఇప్పుడు ఇలాంటి నిర్ణయాలు తీసుకోవడం దురదృష్టకరమని ఆయన వ్యాఖ్యానించారు.
ప్రభుత్వ ప్రధాన కార్యదర్శి కె. రామకృష్ణారావు జారీ చేసిన ఈ ఉత్తర్వులు ప్రభుత్వ ఉద్యోగులు, ఉపాధ్యాయులు, కాంట్రాక్ట్ మరియు ఔట్సోర్సింగ్ సిబ్బందికి కూడా వర్తిస్తాయి. ముస్లింలు రంజాన్ నెలలో తెల్లవారుజాము నుంచి సూర్యాస్తమయం వరకు కఠిన ఉపవాస దీక్షలో ఉంటారు కాబట్టి మానవతా దృక్పథంతో ఈ నిర్ణయం తీసుకున్నట్లు ప్రభుత్వం స్పష్టం చేస్తోంది. అయినప్పటికీ, దీనిపై హిందూ ధార్మిక సంస్థల నుంచి వస్తున్న అభ్యంతరాలు ప్రస్తుతం రాష్ట్ర రాజకీయాల్లో చర్చనీయాంశంగా మారాయి.