ఉత్తర కశ్మీర్లోని కుప్వారా జిల్లా, కేరన్ సెక్టార్లో నియంత్రణ రేఖ (LoC) వెంట భారత్, పాకిస్థాన్ సైన్యాల మధ్య కాల్పులు చోటుచేసుకున్నాయి. సరిహద్దు భద్రతను మరింత కట్టుదిట్టం చేసే ఉద్దేశంతో భారత సైన్యానికి చెందిన 6 రాష్ట్రీయ రైఫిల్స్ దళాలు కేరన్ బాలా ప్రాంతంలో అధునాతన నిఘా కెమెరాలను ఏర్పాటు చేస్తున్నాయి. సరిహద్దుల్లోని ‘బ్లైండ్ స్పాట్లను’ తొలగించి నిఘా పెంచేందుకు చేస్తున్న ఈ ప్రయత్నాన్ని అడ్డుకోవాలని చూసిన పాక్ దళాలు, భారత సైనికులపై రెండు రౌండ్ల కాల్పులు జరిపాయి. దీనికి దీటుగా సమాధానమిచ్చిన భారత సైన్యం కూడా ఒక రౌండ్ కాల్పులు చేపట్టింది.
సాధారణంగా శీతాకాలంలో మంచు కురిసే సమయంలో పాక్ వైపు నుండి చొరబాట్లు ఎక్కువగా జరుగుతుంటాయి. ఈ కాల్పులు కూడా ఉగ్రవాదుల చొరబాటును సులభతరం చేసేందుకు, భారత సైన్యం దృష్టిని మళ్లించేందుకు చేసిన కుట్రగా రక్షణ వర్గాలు భావిస్తున్నాయి. ఈ నేపథ్యంలో అప్రమత్తమైన భారత సైన్యం, దట్టమైన అటవీ ప్రాంతంలో భారీ ఎత్తున ‘కార్డన్ సెర్చ్’ ఆపరేషన్ ప్రారంభించింది. చొరబాటుదారులు ఎవరైనా సరిహద్దు దాటి లోపలికి వచ్చారా అనే కోణంలో గాలింపు చర్యలు ముమ్మరం చేశారు.
ఇటీవలి కాలంలో పాకిస్థాన్ సైన్యం సరిహద్దుల్లో డ్రోన్లను పంపుతూ నిరంతరం కయ్యానికి కాలుదువ్వుతోంది. గతంలో జరిగిన ‘ఆపరేషన్ సిందూర్’ తర్వాత మళ్లీ ఇప్పుడు ఇటువంటి దుందుడుకు చర్యలకు పాల్పడటం గమనార్హం. ప్రస్తుతం కేరన్ సెక్టార్ అంతటా భద్రతను అత్యున్నత స్థాయికి పెంచారు. సరిహద్దు వెంట సాంకేతిక పరిజ్ఞానాన్ని నవీకరిస్తూ నిరంతర పర్యవేక్షణ కొనసాగిస్తున్నారు. ఈ కాల్పుల ఘటనలో ఎటువంటి ప్రాణనష్టం జరగలేదని ప్రాథమిక సమాచారం అందుతోంది.