ప్రేమ మాయలో పాక్ ప్రయాణం: పంజాబ్లోని కపుర్తలా జిల్లాకు చెందిన 48 ఏళ్ల సరబ్జీత్ కౌర్, గతేడాది నవంబర్లో సిక్కు యాత్రికురాలిగా పాకిస్థాన్ వెళ్లారు. అక్కడ సోషల్ మీడియా ద్వారా పరిచయమైన నాసిర్ హుస్సేన్ అనే వ్యక్తిని కలిశారు. ఆపై మతం మార్చుకుని అతడిని వివాహం చేసుకున్నారు. ఆ సమయంలో తాను ఇష్టపూర్వకంగానే వివాహం చేసుకున్నట్లు వీడియోలు విడుదల చేసినప్పటికీ, ఇప్పుడు ఆమె తన మొదటి భర్తకు పంపిన ఆడియో క్లిప్లో షాకింగ్ నిజాలు వెల్లడయ్యాయి.
అశ్లీల ఫోటోలతో బ్లాక్మెయిల్: ప్రస్తుతం వైరల్ అవుతున్న ఆడియోలో సరబ్జీత్ తన గోడు వెళ్లబోసుకున్నారు. తాను ప్రేమ కోసం పాకిస్థాన్ వెళ్లలేదని, నాసిర్ హుస్సేన్ తన వద్ద ఉన్న తన అశ్లీల ఫోటోలతో బ్లాక్మెయిల్ చేయడంతో, వాటిని డిలీట్ చేయించుకోవడానికి వెళ్లానని తెలిపారు. అక్కడ తనను తీవ్రంగా వేధిస్తున్నారని, తినడానికి తిండి లేక అడుక్కునే స్థితికి వచ్చానని ఆవేదన వ్యక్తం చేశారు. తన పిల్లలు లేనిదే తాను బతకలేనని, ఎలాగైనా తనను భారత్కు రప్పించాలని కన్నీరుమున్నీరు అయ్యారు.
చట్టపరమైన చిక్కులు మరియు గూఢచారి ముద్ర: ప్రస్తుతం సరబ్జీత్ పరిస్థితి అత్యంత క్లిష్టంగా మారింది. ఆమె వీసా గడువు ముగియడం ఒక సమస్య అయితే, ఆమె ‘భారత గూఢచారి’ అయి ఉండవచ్చని పాక్ మాజీ ఎమ్మెల్యే మహేందర్ పాల్ సింగ్ కోర్టులో పిటిషన్ వేయడం పరిస్థితిని మరింత దారుణంగా మార్చింది. ప్రస్తుతం ఆమె భర్త పోలీస్ కస్టడీలో ఉండగా, సరబ్జీత్ను లాహోర్లోని ప్రభుత్వ షెల్టర్ హోమ్ (దారుల్ అమన్)కు తరలించారు. వాఘా-అటారీ సరిహద్దు మూసివేత కారణంగా ఆమెను భారత్కు పంపే ప్రయత్నాలు ప్రస్తుతానికి నిలిచిపోయాయి.