పథకాన్ని పక్కదారి పట్టించిన ముఠా: మధ్యప్రదేశ్లోని గ్వాలియర్-చంబల్ ప్రాంతంలో కేంద్ర ప్రభుత్వ ప్రతిష్టాత్మక పథకం ప్రధాన మంత్రి జీవన్ జ్యోతి బీమా యోజన (PMJJBY) లక్ష్యంగా భారీ మోసం వెలుగులోకి వచ్చింది. బతికున్న వ్యక్తులు చనిపోయినట్లు నకిలీ పత్రాలు సృష్టించి, వారి పేరు మీద వచ్చే బీమా సొమ్మును ఒక ముఠా కాజేస్తోంది. మధ్యప్రదేశ్ పోలీసుల ఆర్థిక నేరాల విభాగం (EOW) జరిపిన దర్యాప్తులో ఈ షాకింగ్ నిజాలు బయటపడ్డాయి. గత ఐదేళ్లుగా (2020 నుండి 2024 వరకు) ఎవరికీ అనుమానం రాకుండా ఈ దోపిడీ యథేచ్ఛగా సాగుతోంది.
మోసం సాగిందిలా.. (Modus Operandi): నిందితులు గ్వాలియర్ మున్సిపల్ కార్పొరేషన్ అధికారుల సహకారంతో బతికి ఉన్న పేదవారి పేరు మీద నకిలీ డెత్ సర్టిఫికేట్లను సృష్టించేవారు. అనంతరం షియోపూర్ జిల్లాలోని యూనియన్ బ్యాంక్ ఆఫ్ ఇండియా బ్రాంచ్ ద్వారా ఈ పత్రాలను పంపి, ఒక్కో క్లెయిమ్ కింద రూ. 2 లక్షల బీమా సొమ్మును పొందేవారు. అమాయక కుటుంబాలకు అందాల్సిన ఈ డబ్బును ముఠా సభ్యులు తమ సొంత బ్యాంకు ఖాతాలకు మళ్లించుకునేవారు. షియోపూర్ జిల్లాలో క్లెయిమ్ డేటాను క్షుణ్ణంగా పరిశీలించినప్పుడు, తనిఖీ చేసిన 6 కేసుల్లో 5 కేసులు ఫేక్ అని తేలడంతో అధికారులు అవాక్కయ్యారు.
అధికారులు, బ్యాంక్ సిబ్బంది కుమ్మక్కు: ఈ కుంభకోణంలో ఎల్ఐసీ, ఎస్బీఐ లైఫ్, ఐసీఐసీఐ ప్రుడెన్షియల్ వంటి దాదాపు 8 ప్రముఖ బీమా కంపెనీల నుంచి డబ్బులు కొట్టేసినట్లు గుర్తించారు. ఈ ముఠాలో ప్రధానంగా దీపమాల మిశ్రా, జిజ్ఞేష్ ప్రజాపతి, నవీన్ మిట్టల్, పూజా కుమారి అనే వ్యక్తులు కీలక పాత్ర పోషించగా, వారికి మున్సిపల్ మరియు బ్యాంక్ ఉద్యోగులు సహకరించినట్లు తేలింది. నిందితులపై ఫోర్జరీ, నేరపూరిత కుట్ర, మోసం వంటి సెక్షన్ల కింద కేసులు నమోదు చేసి, ఈ నెట్వర్క్ ఇంకా ఎంతమందికి విస్తరించి ఉందనే కోణంలో పోలీసులు ముమ్మరంగా దర్యాప్తు చేస్తున్నారు.