పేదల ఆకలి తీర్చిన శివ రహస్య బృందం సేవా కార్యక్రమం.

తేదీ: 20-12-2025 TSLAWNEWS అమీన్పూర్ మండలం రిపోర్టర్ రాము రావు చాతరాజు.

పటాన్చెరు:ఆధ్యాత్మిక భావనకు సేవా సంకల్పాన్ని జోడిస్తూ శివ రహస్య బృందం ఆధ్వర్యంలో అమావాస్య, పౌర్ణమి తిథులను పురస్కరించుకుని అన్న సమారాధన కార్యక్రమాన్ని నిర్వహిస్తున్నారు. సమాజంలోని పేదలు, నిరుపేదలు, ఆకలితో ఉన్నవారికి ఉచిత భోజన సౌకర్యం కల్పించడమే లక్ష్యంగా ఈ సేవా కార్యక్రమాన్ని చేపట్టారు.

భారతీయ సంప్రదాయంలో అమావాస్య అంతర్ముఖ చింతనకు, పౌర్ణమి పూర్ణత్వానికి ప్రతీకగా భావిస్తారు. ఈ పవిత్ర దినాల్లో ఉపవాసం, ధ్యానం, దానధర్మాలు ఆచరించడం ద్వారా మానసిక ప్రశాంతతతో పాటు ఆధ్యాత్మిక శుద్ధి కలుగుతుందని పెద్దల విశ్వాసం. ఈ భావజాలాన్ని ఆచరణలోకి తీసుకొస్తూ శివ రహస్య బృందం అన్నదాన శిబిరాలను క్రమం తప్పకుండా నిర్వహిస్తూ మానవ సేవకు అంకితమవుతోంది.
పేదరికం, అనారోగ్యం తదితర కారణాల వల్ల రోజువారీ భోజనానికి నోచుకోని వారికి పౌష్టికాహారాన్ని అందించడమే ఈ కార్యక్రమ ప్రధాన ఉద్దేశ్యంగా నిర్వాహకులు తెలిపారు. “అన్నం పంచుదాం – ప్రేమను పంచుదాం” అనే నినాదంతో ఈ కార్యక్రమాన్ని నిరంతరంగా కొనసాగిస్తున్నారు.
ఈ అన్న సమారాధన కార్యక్రమాన్ని డాక్టర్ గోవింద్ సింగ్ స్థాపకత్వంలో నిర్వహించగా, పోల స్వప్న, వేముల శ్రీప్రియ, అర్థం కవిత, నరసింహ తదితరులు కార్యక్రమ నిర్వహణలో చురుకుగా పాల్గొన్నారు. ఈ సందర్భంగా డాక్టర్ గోవింద్ సింగ్ మాట్లాడుతూ, ఆకలితో ఉన్నవారికి అన్నం పెట్టడం కన్నా గొప్ప సేవ మరొకటి లేదని, టీం సభ్యులందరి సహకారంతో భవిష్యత్తులోనూ ఇలాంటి సేవా కార్యక్రమాలను కొనసాగిస్తామని తెలిపారు.