తెలంగాణ ముఖ్యమంత్రి ఎ. రేవంత్ రెడ్డి, మాజీ ప్రధానమంత్రి ఇందిరా గాంధీ జయంతి సందర్భంగా ‘ఇందిరమ్మ చీరల పంపిణీ’ పథకాన్ని ప్రారంభించారు. ఈ పథకం కింద కోటి మంది మహిళలకు కోటి చీరలు పంపిణీ చేయనున్నారు. నెక్లెస్ రోడ్లోని ఇందిరా గాంధీ విగ్రహానికి పూలమాలలు వేసి, ఆమె సేవలను స్మరించుకున్న తర్వాత, సీఎం రేవంత్ రెడ్డి పలువురు లబ్ధిదారులకు చీరలు అందజేసి పంపిణీని ప్రారంభించారు. ఈ చీరలు ముఖ్యంగా సిరిసిల్ల నేత కళాకారులు తయారు చేయడం విశేషం. ఈ పథకం ద్వారా ప్రభుత్వం మహిళా సాధికారతకు కృషి చేస్తున్నట్లు సీఎం రేవంత్ రెడ్డి పేర్కొన్నారు.
సీఎం రేవంత్ రెడ్డి మాట్లాడుతూ, తమ ప్రభుత్వం మహిళలను కోటీశ్వరులుగా తీర్చిదిద్దాలని లక్ష్యం పెట్టుకుందని, వారి ఆర్థిక బలోపేతానికి కృషి చేస్తున్నామని తెలిపారు. ఈ లక్ష్యం సాధనలో భాగంగా, పెట్రోల్ బంకులు, TGSRTCకు 1,000 బస్సులు మహిళా స్వయం సహాయక బృందాలకు కేటాయించినట్లు ప్రకటించారు. అంతేకాకుండా, ఇందిరమ్మ ఇళ్లు మహిళల పేరుతోనే మంజూరు చేయడం, రాజకీయంలో మహిళలకు ప్రాధాన్యత ఇవ్వడం వంటి అంశాలను ప్రస్తావించారు. మంత్రులు, ఎమ్మెల్యేలు, మహిళా అధికారులు కూడా ‘ఇందిరమ్మ చీరలు’ ధరించి, మహిళల స్వయం ప్రతిపత్తికి బ్రాండ్ అంబాసిడర్లుగా మారాలని ఆయన పిలుపునిచ్చారు.
ఈ పథకంలో భాగంగా, రేషన్ కార్డు ఉన్న BPL కుటుంబాల్లోని మహిళలు, వితంతు మహిళలు, వృద్ధాప్య మహిళలు అందరికీ చీరలు పంపిణీ చేయనున్నారు. ఈ పంపిణీ ప్రక్రియలో పారదర్శకత కోసం టెక్నాలజీని ఉపయోగిస్తున్నామని, నాణ్యతపై ఎటువంటి రాజీ లేకుండా పర్యవేక్షణ చేస్తున్నామని సీఎం తెలిపారు. మొత్తం బడ్జెట్ రూ.1,000 కోట్లుగా కేటాయించారు. చీరల తయారీకి సమయం తీసుకుంటుంది కాబట్టి, పంపిణీ రెండు దశల్లో జరుగుతుందని ఆయన స్పష్టం చేశారు. ఈ సందర్భంగా లబ్ధిదారులు మాట్లాడుతూ, ఇందిరామహిళా శక్తి చీరలు ఇవ్వడం ద్వారా తమకు యూనిఫాం వచ్చిందనే సంతోషం ఉందని, ఇది తమ సంఘాల మహిళలకు ప్రత్యేక గుర్తింపు ఇస్తుందని సీఎంకు కృతజ్ఞతలు తెలిపారు.