ఐబొమ్మ పైరసీ కేసులో అరెస్ట్ అయిన నిందితుడు ఇమ్మడి రవి తండ్రి అప్పారావు మీడియాకు స్పందిస్తూ తీవ్ర భావోద్వేగానికి లోనయ్యారు. తన కుమారుడు రవి తప్పు చేశాడని అంగీకరిస్తూనే, తన మనవరాలి భవిష్యత్తును దృష్టిలో ఉంచుకుని రవికి తక్కువ శిక్ష పడేలా చూడాలని ఆయన అధికారులను వేడుకున్నారు. “మా అబ్బాయి తప్పు చేశాడన్నది నిజమే. కానీ వాడికి ఓ చిన్న కూతురు ఉంది. ఆమె భవిష్యత్తు గురించే నా ఆందోళన అంతా. నా మీద దయ ఉంచి వాడిని స్టేషన్లో కష్టపెట్టకుండా చూడాలని కోరుకుంటున్నాను,” అని ఆయన తన బాధను వ్యక్తం చేశారు.
చట్టం ముందు అందరూ సమానమేనని తనకు తెలుసని, చట్టానికి జాలి, దయ వంటివి ఉండవని అప్పారావు నిస్సహాయత వ్యక్తం చేశారు. తప్పు చేసిన వారందరూ ఒకటేనని, తన మనవరాలి కోసం తన కొడుకును విడిచిపెట్టరని తనకు తెలుసని అన్నారు. ఈ సమయంలో బాధపడటం మరియు నిస్సత్తువ చెందడం తప్ప తాను చేయగలిగింది ఏమీ లేదని ఆయన వాపోయారు. ప్రస్తుతం తన కోడలు కూడా తనతో మాట్లాడటం లేదని ఆయన తెలిపారు.
ఐబొమ్మ వెబ్సైట్ ద్వారా కొత్త చిత్రాలను పైరసీ చేసి కోట్లాది రూపాయలు సంపాదించారన్న ఆరోపణల నేపథ్యంలో రవిని అరెస్ట్ చేశారు. ఈ కేసు విచారణ కొనసాగుతున్న నేపథ్యంలో, రవి తండ్రి చేసిన ఈ ఆర్తితో కూడిన విజ్ఞప్తి పలువురిని కలచివేస్తోంది.