విశాఖపట్నంలో జరుగుతున్న 30వ సీఐఐ (CII) భాగస్వామ్య సదస్సు కేవలం ఒప్పందాలకే పరిమితం కాకుండా, కొత్త ప్రాజెక్టులకు శంకుస్థాపనలకు వేదికగా నిలిచింది. ఈ సదస్సు వేదిక నుంచే ముఖ్యమంత్రి చంద్రబాబు నాయుడు అనంతపురం జిల్లాలో ఏర్పాటు చేయనున్న రేమాండ్ గ్రూప్ ప్రాజెక్టులకు వర్చువల్గా శంకుస్థాపన చేశారు. ఈ శంకుస్థాపన కార్యక్రమంలో రేమాండ్ గ్రూప్ మేనేజింగ్ డైరెక్టర్ గౌతమ్ మైనీ, కార్పొరేట్ డెవలప్మెంట్ హెడ్ జతిన్ ఖన్నాతో పాటు మంత్రి టీజీ భరత్ కూడా పాల్గొన్నారు. రూ. 1201 కోట్ల పెట్టుబడులతో రాష్ట్రంలో మూడు వేర్వేరు ప్రాజెక్టులను రేమాండ్ గ్రూప్ ఏర్పాటు చేయనుంది.
రేమాండ్ గ్రూప్ రాష్ట్రంలో మొత్తం రూ. 1201 కోట్ల పెట్టుబడులతో మూడు యూనిట్లను ఏర్పాటు చేయనుంది. అవి:
-
సిల్వర్ స్పార్క్ అప్పారెల్ మాన్యుఫాక్చరింగ్ పార్క్: రాప్తాడులో రూ. 497 కోట్ల వ్యయంతో ఏర్పాటు.
-
ఆటో కాంపోనెంట్ మాన్యుఫాక్చరింగ్ ప్లాంట్: అనంతపురం జిల్లా గుడిపల్లిలో రూ. 441 కోట్లతో ఏర్పాటు.
-
ఏరోస్పేస్ పరికరాల తయారీ యూనిట్: అనంతపురం జిల్లా టెకులోదు వద్ద రూ. 262 కోట్లతో ఏర్పాటు.
మొత్తంగా, ఈ మూడు ప్రాజెక్టుల ద్వారా 6,500 మందికి ప్రత్యక్షంగా ఉద్యోగ అవకాశాలు లభిస్తాయని రేమాండ్ సంస్థ వెల్లడించింది. ఈ ప్రాజెక్టుల కోసం ప్రభుత్వంతో ఒప్పందం జరగడమే కాకుండా, పనులకు శంకుస్థాపన కూడా పూర్తి చేసుకున్నారు.
సీఐఐ సదస్సు రెండో రోజున ముఖ్యమంత్రి చంద్రబాబు నాయుడు దేశ విదేశాలకు చెందిన ప్రతినిధులతో సమావేశమవుతున్నారు. ఎల్జీ కెమ్, అట్మాస్పియర్ కోర్, ఇఫ్కో, కార్డెలియా క్రూయిజెస్, సుమిటోమో మిత్సుయ్ బ్యాంకింగ్ కార్పొరేషన్ వంటి సంస్థల అధిపతులు, న్యూజిలాండ్, జపాన్, మెక్సికో దేశాల ప్రతినిధులతో సీఎం భేటీ కానున్నారు. రాష్ట్రంలో పెట్టుబడులు పెట్టేందుకు ఉన్న అవకాశాలు, గ్రీన్ హైడ్రోజన్ వ్యాలీ, సస్టైనబుల్ సిటీస్, ఏపీ టూరిజం విజన్ వంటి అంశాలపై ముఖ్యమంత్రి వివరించనున్నారు. ఈరోజు కూడా ముఖ్యమంత్రి సమక్షంలో కంపెనీలు పెద్ద ఎత్తున ఎంఓయూలు చేసుకునే అవకాశం ఉంది.