తెలంగాణ ముఖ్యమంత్రి రేవంత్ రెడ్డి, శ్రీశైలం లెఫ్ట్ బ్యాంక్ కెనాల్ (SLBC) టన్నెల్ ప్రాజెక్టును నాగర్కర్నూల్ జిల్లా అచ్చంపేట మండలంలోని మన్నెవారిపల్లి వద్ద ఆకస్మికంగా పరిశీలించారు. ఈ సందర్భంగా ఆయన ప్రాజెక్టు ఆలస్యం, అవినీతి, సాంకేతిక లోపాలపై ఘాటుగా స్పందించారు. గతంలో కాంట్రాక్టర్ల నుంచి కమీషన్లు రాకపోవడంతోనే గత బీఆర్ఎస్ ప్రభుత్వం పనులను ఉద్దేశపూర్వకంగా ఆపివేసిందని ఆయన ఆరోపించారు. ఫలితంగా ప్రాజెక్టు దశాబ్దకాలం ఆలస్యమై, కార్మికుల ప్రాణాలు కోల్పోవాల్సి వచ్చిందని, దీనికి మాజీ సీఎం కేసీఆర్ పరోక్షంగా బాధ్యత వహించాల్సిందిగా పేర్కొన్నారు.
ఈ ప్రాజెక్టు పనులను వేగవంతం చేసేందుకు, సీఎం రేవంత్ రెడ్డి మంత్రులు ఉత్తమ్ కుమార్ రెడ్డి, కోమటిరెడ్డి వెంకట్ రెడ్డితో కలిసి ఏరియల్ ఎలక్ట్రోమాగ్నెటిక్ సర్వే కార్యక్రమాన్ని ప్రారంభించారు. నేషనల్ జియోఫిజికల్ రీసెర్చ్ ఇన్స్టిట్యూట్ (NGRI) ఆధ్వర్యంలో జరుగుతున్న ఈ హెలిబోర్న్ మాగ్నెటిక్ సర్వే ద్వారా భూగర్భంలో వెయ్యి మీటర్ల లోతులో ఉన్న షియర్ జోన్లు, నీటి ప్రవాహ దిశలు వంటి వివరాలను గుర్తించవచ్చు. గతంలో రూ.2 వేల కోట్లతో పూర్తయ్యే ఈ ప్రాజెక్టు, ఇప్పుడు రూ.4,600 కోట్లకు చేరిందని సీఎం తెలిపారు.
మిగిలిన 9.88 కిలోమీటర్ల టన్నెల్ను పూర్తి చేయడానికి కొత్త సాంకేతికతను ఉపయోగిస్తామని సీఎం స్పష్టం చేశారు. ఈ పనుల్లో మాజీ ఆర్మీ అధికారి అయిన ఉత్తమ్ కుమార్ రెడ్డి అనుభవం ఎంతో ఉపయోగపడుతుందని ఆయన అన్నారు. బీఆర్ఎస్ ఎన్ని అడ్డంకులు సృష్టించినా, ఈ ప్రాజెక్టును సమయానుకూలంగా పూర్తి చేసి, 4 వేల క్యూసెక్కుల నీటిని గ్రావిటీ ద్వారా నల్గొండ జిల్లాకు తరలించేలా కాంగ్రెస్ ప్రభుత్వం కృషి చేస్తుందని హామీ ఇచ్చారు. ఈ ప్రాజెక్టు పూర్తయ్యాక దేశంలోనే అత్యుత్తమ ఇంజినీరింగ్ ప్రాజెక్టులలో ఒకటిగా నిలుస్తుందని ఆయన నమ్మకం వ్యక్తం చేశారు.