గ్లోబల్ స్టార్ రామ్ చరణ్ హీరోగా, ‘ఉప్పెన’ దర్శకుడు బుచ్చిబాబు సానా దర్శకత్వంలో ప్రతిష్టాత్మకంగా రూపొందుతున్న చిత్రం ‘పెద్ది’ (Peddi Movie) నుంచి తాజాగా ఒక ముఖ్యమైన అప్డేట్ను మేకర్స్ విడుదల చేశారు. ఈ చిత్రంలో కథానాయికగా నటిస్తున్న బాలీవుడ్ నటి జాన్వీ కపూర్ (Janhvi Kapoor) ఫస్ట్ లుక్ను, ఆమె పాత్ర పేరుతో కలిసి అధికారికంగా పరిచయం చేశారు.
జాన్వీ కపూర్ ఈ చిత్రంలో ‘అచ్చియమ్మ’ అనే పల్లెటూరి యువతి పాత్రలో కనిపించనుంది. విడుదల చేసిన పోస్టర్లో ఆమె డీ-గ్లామర్ లుక్లో ఆకట్టుకుంటూ, గ్రామీణ వాతావరణంలో సహజంగా మిళితమై కనిపిస్తోంది. మేకర్స్ ఆమె పాత్రను “పెద్ది ప్రేమించే ఫైర్బ్రాండ్ ఆటిట్యూడ్ ఉన్న అమ్మాయి అచ్చియమ్మ” అంటూ వర్ణించారు. ఈ మాసీ అవతార్తో అభిమానుల్లో సినిమాపై అంచనాలు మరింతగా పెరిగాయి.
పాన్-ఇండియా స్థాయిలో తెరకెక్కుతున్న ఈ భారీ యాక్షన్ డ్రామాలో శివరాజ్కుమార్, జగపతి బాబు, దివ్యేందు శర్మ వంటి ప్రముఖ నటులు కీలక పాత్రల్లో కనిపించనున్నారు. సంగీతాన్ని ఏఆర్. రెహమాన్ అందిస్తుండగా, రత్నవేలు సినిమాటోగ్రఫీని నిర్వహిస్తున్నారు. వృద్ధి సినిమాస్, సుకుమార్ రైటింగ్స్, మైత్రీ మూవీ మేకర్స్ నిర్మిస్తున్న ఈ పీరియాడిక్ యాక్షన్ డ్రామా 2026 మార్చి 27న ప్రపంచవ్యాప్తంగా విడుదల కానుంది.