వలసల నియంత్రణ మరియు జాతీయ భద్రత లక్ష్యంగా యూఎస్ కస్టమ్స్ అండ్ బోర్డర్ ప్రొటెక్షన్ (CBP) ఒక కీలక నిర్ణయం తీసుకుంది. ఇకపై గ్రీన్కార్డు హోల్డర్లతో సహా అమెరికాయేతర పౌరులందరినీ దేశంలోకి ప్రవేశించేటప్పుడు, దేశం విడిచి వెళ్లేటప్పుడు కూడా తప్పనిసరిగా ఫొటోలు, బయోమెట్రిక్ డేటా సేకరించాలని ఆదేశాలు జారీ చేసింది. ఈ కొత్త నిబంధనలు డిసెంబర్ 26వ తేదీ నుంచి పూర్తి స్థాయిలో అమలులోకి రానున్నాయి.
ఈ నూతన విధానం ప్రకారం, విమానాశ్రయాలు, సముద్ర మార్గాలు లేదా భూ మార్గాల ద్వారా దేశంలోకి వచ్చే, వెళ్లే ప్రతి ఒక్క అమెరికాయేతర పౌరుడి నుంచి CBP సిబ్బంది ఫొటోలను, ఇతర వ్యక్తిగత డేటాను సేకరించనున్నారు. నకిలీ ప్రయాణ పత్రాలను అరికట్టడం మరియు దేశ భద్రతను మరింత బలోపేతం చేయడమే ఈ నిర్ణయం యొక్క ప్రధాన లక్ష్యం.
ముఖ్యంగా, వీసా గడువు ముగిసిన తర్వాత కూడా అనధికారికంగా దేశంలోనే ఉండిపోయే వారిని (ఓవర్స్టేస్) గుర్తించడంలో ఈ ఫేషియల్ రికగ్నిషన్, బయోమెట్రిక్ విధానం కీలకం కానుంది. ఈ చర్య ట్రంప్ పరిపాలన యొక్క కఠిన వలసల విధానంలో భాగంగా విశ్లేషకులు భావిస్తున్నారు. ఈ నిర్ణయం వల్ల దేశ భద్రత పెరుగుతుందని అధికారులు భావిస్తుండగా, గ్రీన్కార్డుదారులు, విదేశీయుల ప్రయాణం మరింత సంక్లిష్టంగా మారనుంది.