టాలీవుడ్ హీరో నారా రోహిత్, నటి సిరిలేళ్ల త్వరలో వివాహ బంధంతో ఒక్కటి కాబోతున్నారు. అభిమానులు ఆసక్తిగా ఎదురుచూస్తున్న వీరి వివాహ తేదీకి సంబంధించిన అప్డేట్ తాజాగా వెలువడింది. ఈ జంట అక్టోబర్ 30న వివాహ బంధంలోకి అడుగుపెట్టనున్నట్లు సమాచారం. కుటుంబ సభ్యులు, బంధుమిత్రుల సమక్షంలో ఆ రోజు మూడు ముళ్ల బంధంతో ఈ జంట ఒక్కటి కానుంది. ఇటీవలే వీరి పెళ్లి పనులు కూడా ప్రారంభమైనట్లు తెలుపుతూ, సిరిలేళ్ల పసుపు దంచే కార్యక్రమం ఫోటోలను సోషల్ మీడియాలో పంచుకున్నారు.
నారా రోహిత్, సిరిలేళ్ల వివాహ వేడుకలు దాదాపు నాలుగు రోజుల పాటు హైదరాబాద్లో అంగరంగ వైభవంగా జరగనున్నాయి. పలు వేదికల్లో ఈ కార్యక్రమాలను ఏర్పాటు చేశారు. తెల్లాపూర్లోని మండువా ప్రాంగణంలో హల్దీ వేడుకలతో వివాహ కార్యక్రమాలు ప్రారంభమవుతాయి. ఆ తర్వాత, ఐటీసీ గ్రాండ్ కాకతీయలో ‘పెళ్లి కొడుకును చేసే’ వేడుక నిర్వహించనున్నట్లు తెలుస్తోంది. అనంతరం మళ్లీ మండువా ప్రాంగణంలో మెహందీ వేడుక జరగనున్నట్లు సమాచారం.
ఈ వివాహ వేడుకలకు సినీ తారలు మరియు రాజకీయ ప్రముఖులు పెద్ద సంఖ్యలో హాజరుకానున్నారు. నారా కుటుంబానికి చెందిన నారా రోహిత్ వివాహం కావడంతో, ఆంధ్రప్రదేశ్ రాజకీయ ప్రముఖులతో పాటు టాలీవుడ్ ప్రముఖులు కూడా ఈ వేడుకలకు హాజరుకానున్నారు. అక్టోబర్ 30న ఈ జంట వైవాహిక జీవితంలోకి అడుగుపెట్టనుంది.