టీమిండియా యువ క్రికెటర్ తిలక్ వర్మ మెగాస్టార్ చిరంజీవిని మర్యాదపూర్వకంగా కలిశారు. ఆసియా కప్ ఫైనల్లో అద్భుత ప్రదర్శనతో భారత జట్టు విజయంలో కీలక పాత్ర పోషించిన తిలక్ వర్మను, తెలుగు రాష్ట్రాల యువ ప్రతిభను ప్రోత్సహించడంలో ముందుండే చిరంజీవి తన రాబోయే చిత్రం ‘మన శంకర వరప్రసాద్ గారు’ సినిమా సెట్స్కి ఆహ్వానించారు. ఈ సందర్భంగా చిరంజీవి తిలక్ వర్మను పూలమాలతో ఘనంగా సత్కరించి, అంతర్జాతీయ స్థాయిలో ఆయన కనబరుస్తున్న అద్భుతమైన ప్రతిభను ప్రత్యేకంగా ప్రశంసించారు.
చిరంజీవి, తిలక్ వర్మ వచ్చిన వెంటనే ఆలింగనం చేసుకుని అభినందించారు. తెలుగు తేజం అంతర్జాతీయ స్థాయిలో రాణించడం గర్వకారణమని పేర్కొన్న చిరంజీవి, ఇలాగే కృషి చేస్తూ భారత క్రికెట్కు మరిన్ని విజయాలు అందించాలని ఆకాంక్షించారు. ఈ ప్రారంభ దశలో క్రమశిక్షణ, వినయం, కృషి ఎంతో ముఖ్యమని యువ క్రికెటర్కు సూచించారు. అగ్ర నటుడి నుంచి ప్రశంసలు అందుకోవడం పట్ల తిలక్ వర్మ తన సంతోషాన్ని వ్యక్తం చేశారు.
అనంతరం, ‘మన శంకర వరప్రసాద్ గారు’ చిత్ర బృందం తిలక్ వర్మతో కేక్ కట్ చేయించి తమ ఆనందాన్ని పంచుకుంది. ఈ కార్యక్రమంలో చిత్ర యూనిట్ సభ్యులు కూడా పాల్గొన్నారు. మెగాస్టార్ తరచూ యువ ప్రతిభను ప్రోత్సహిస్తూ వస్తున్నారు. గతంలో సైక్లిస్ట్, షూటర్, బాక్సర్ వంటి యువ క్రీడాకారులను కూడా తన ఇంటికి ఆహ్వానించి అభినందించారు. ఇప్పుడు తిలక్ వర్మను గౌరవించడం ఆయనకు యువతపై ఉన్న ప్రేమను మరోసారి రుజువు చేసింది. ఈ కార్యక్రమానికి సంబంధించిన ఫొటోలు ప్రస్తుతం సోషల్ మీడియాలో వైరల్ అవుతున్నాయి.